李璨琛（Sam）的3歲囡囡李元元（Lucy）可愛又搞笑，Sam留港期間不時和女兒享受父女樂，昨天Sam為Lucy搽指甲油，Lucy留言寫道：「當紋身佬成為了修甲師 #我話俾你知呀 #你好同我油好啲呀。」除了幫囡囡搽指甲油外，Sam又陪Lucy學游水，Sam寫道：「爸爸決定呢個暑假教識你游水。未學游先學浮，浮過浮台。」
到今午Lucy媽在Instagram貼片，片中見到Lucy走入父母房，起初Lucy笑笑口表示想出街食Lunch，不過媽咪表示今天要留在家中食晏，不會出去吃，原本笑晒口的Lucy瞬間變臉爆喊撒嬌，又用張被拭淚，網民留言笑指Lucy示範「一秒傷心大法」：「啲戲好勁呀！表情秒轉。」
