動作演員張文傑早前收到拍攝梁詠琪（Gigi）新歌《流金歲月》MV邀請，視Gigi為女神的他興奮說：「緊張咗幾日，拍攝當日坐車到現場時，仲好緊張，我好耐冇試過咁緊張！我好喜歡睇《初戀無限Touch》，希望有一日做佢嘅沈志康(陳曉東飾演），仲好記得佢唱：『地下鐵碰着他』。」
張文傑初時還以為要拍動作打鬥場面，當導演告訴他在MV演繹前夫一角，回顧結婚後甜蜜幸福時光畫面，他心情複雜：「好興奮又好膽心，除咗動作戲分，我一直都想挑戰唔同角色，但擔心自己演得唔好，因為未試過演繹溫馨角色。」
拍攝當日見到Gigi時，張文傑表現投入：「已經唔可以尷尬，要忘記緊張，只係全程投入，已經當咗Gigi係我最愛嘅人，望住佢，幻想同佢一齊時候嘅美好，一路感覺到好甜美。」
張文傑還感謝導演Maggie：「我想講呢個導演真係好大膽，我有少少懷疑導演係咪認錯人。今次演繹呢個角色，畀人睇到我嘅另一面，畀人知道我唔係淨係識得打打殺殺，不過好難抽離角色，因為我掛住Gigi幾日，個心好囉囉攣。」
