瞓身操肌|拍劇激活運動細胞 王智騫告別「孱仔」變肌男 (18:33)

文章日期:2021年09月15日

以游泳為題材的ViuTV青春劇《i.Swim》拍攝得如火如荼,除了MIRROR成員呂爵安(Edan)和邱士縉(Stanley),以及魏浚笙和陳毅燊(ANSONBEAN)演出外,曾參演電影《熱血合唱團》、現年24歲的太陽娛樂藝人王智騫(Martin)亦有份演出。Martin為迎合角色更積極操肌,由昔日的「孱仔」變成腹肌男,唔打得都睇得!

讀Fashion出身的Martin向來不太熱愛運動,但因應今次角色需要,兩個月來「瞓身」操肌,他說:「今次角色需要望落去有少少線條,游水訓練時見到其他演員都好弗,感覺上有對比,我唔想拖垮人哋,所以跑去做gym,每星期操3至4日,主要操胸、膊及腹,再配合飲食,少糖少油,主要食雞胸、西蘭花、三文魚,低卡低脂。」

自嘲沒有運動天分的Martin表示:「人哋做gym可能操幾日就明白動作點做,我就要操近兩星期先明白。記得初初開始做gym,做完熱身再去做機,做完真係有啲暈同作嘔,初時我都以為自己唔係好得,但教練嘅逼迫下,keep住撐落去,好彩依家有啲成績。」

(即時娛樂)