由3位資深兒童節目主持譚玉瑛、黎芷珊及蓋世寶主持的《童你一起長大了》昨晚（3日）首播，打頭陣登場的是《430穿梭機》一眾主持，除了元祖主持機長張國強及副機長譚玉瑛外，前主持陳嘉輝及龍炳基亦以特別形式登場，與昔日拍檔聚首話當年。
與周星馳（星爺）讀藝訓班的龍炳基，1983年加入《430》，早年移民美國；透過視像現身的龍炳基，談到最難忘往事，就是經常NG，並讚譚玉瑛記性超好：「你畀份稿佢，五、六張紙佢都唔漏，標點符號都記得，仲要連你嗰句說話都可以記埋。」
他又大談與星爺點滴，並笑謂對方是他與太太的「媒人」：「嗰時幫《黑白殭屍》喺廠度拍Opening宣傳片，我同星仔要喺天窗度跳落嚟，星仔跳先，但佢可能出於本能驚，就縮起咗隻腳，當時我跳緊落去，咁就撞咗落我個鼻骨度，咁就爆咗，我成個鼻歪咗，然後我入咗醫院，但就因為咁識咗我老婆，曾華倩次次見到我都笑問：『你仲係嗰個護士老婆？』」
龍炳基又笑指星爺「大頭蝦」，經常「唔見銀包」或「忘記帶銀包」：「咁佢會點呢？佢住得公司近吖嘛，咁佢搭的士返到嚟，然後就衝入嚟化妝間：『基仔基仔，拎住20元嚟。』我就會問：『又嚟做咩？又唔記得帶銀包？』架的士喺出面等緊，佢又衝番出去。
有時喺Canteen食嘢，佢唔記得帶銀包又係咁：『喂！龍炳基同我畀住錢先。』我諗諗吓，佢有冇畀番晒啲錢我呢？我借咗咁多次錢畀佢。」譚玉瑛即打趣謂：「唔怪得我見親佢，佢第一句都係問基仔依家點，可能佢想還番啲錢畀你。」
黎芷珊則笑言：「佢（星爺）對我哋冇咁㗎喎，出去食嘢係佢畀錢㗎喎。」張國強聞言即開玩笑：「你喺佢心目唔係龍炳基，係提款機喎！」
由於星爺練開泰拳，眾人指他當年有「泰仔星」之稱，黎芷珊透露當年星爺最愛找她做靶練腿功，而她則由最初的「大嚇一跳」演變到最後「冇晒反應」。
除了星爺，《430》孕育了梁朝偉、鄭伊健及曾華倩等藝人，節目中播放偉仔及伊健當年的演出，片段所見，偉仔早於1987年已是大忙人，除了要周圍飛宣傳，及是拍劇、綜藝、電影三邊走，難得的是他依然謙虛兼一臉稚氣，張國強盛讚偉仔有跳舞天分：「佢專注力同學習能力都好好，佢好認真想做嗰樣嘢，你想騷擾佢都唔得。佢亦好有自己想法，同埋原來佢跳舞都好叻。」
節目還回顧了譚玉瑛與芷珊的青葱歲月泳衣照，譚玉瑛笑指穿泳衣拍攝，是自己一大突破，當年她答應擔任兒童節目主持前，曾與監製定下四大守則：「唔袒胸露臂、唔著泳衣、唔著短裙、唔著吊帶」；不過為了節目效果，譚玉瑛還是獻出了「第一次」幕前水著，她笑指該套泳衣，更是問阿嫂借回來。
