林師傑偕老婆移居英國 歐陽巧瑩不棄養 帶兩隻愛犬同行 (13:15)

文章日期:2021年12月07日

無綫前藝人林師傑及他的老婆歐陽巧瑩,原來已帶同愛犬移居英國2個幾月,歐陽巧瑩昨晚(6日)在Instagram撰長文吐心聲,她寫道:「香港係我嘅根,從來都冇諗過自己會離開香港。記得三年前,結婚度蜜月人生第一次踏足歐洲,周圍都好靚,老公同我講:『第日想同你一齊黎呢啲地方生活』我記得我個陣答佢:『我真係太鍾意香港喇,冇地方比香港更啱我』。」

歐陽巧瑩慨嘆3年後覺得香港已經太荒謬,令她感到傷心:「有人選擇留低,有人選擇離開。我最後揀咗離開,我想做嘅嘢,留喺香港真係做唔到,冇空間冇自由,希望大家明白。有緣人喺英國相遇記得同我地相認啦,大家互相支持,我可以整叉燒你食(係超好食)。」

她續寫道:「最後講一講點解張機場打卡相會係去瑞士,因爲我養咗兩隻狗(八哥&芝娃娃),好多航空公司都唔運八哥,所以我冇得直飛英國,要先飛瑞士轉機法國,再喺法國搭寵物的士去英國,全程30個鐘,Billy & tado真係好叻好乖,好適應!(有關自己幫狗搞移民嘅詳情可DM問我)。」而久未蒲頭的黃心穎亦有畀讚。

至於林師傑前天在社交網直播,他表示在英國多了空間和時間,他還定了目標,就是希望有農場,可以經營B&B招待大家,同時他亦會繼續整理舊車;此外,林師傑日前在Instagram貼了和媽咪及嬤嬤的視像通話截圖,他表示媽媽原本不懂這些通訊科技,但為了家中逾90歲嬤嬤,便努力學習使用,結果成功,令林師傑大為感動。

(即時娛樂)