七師傅嗌張敬軒做「老公」 以嘴唇加持 贈言「一路向西」 (17:57)

文章日期:2022年01月01日

張敬軒昨晚(12月31日)除夕夜在紅館跟觀眾倒數迎新年,軒仔請來MC $oHo & KidNey(蘇致豪及許賢)、Kayan9896(吳家忻)及七仙羽(七師傅)擔任嘉賓,笑聲叫聲震爆紅館。軒仔安歌兩次,觀眾仍不願離場,最後第3度安哥,軒仔上台唱多一首歌,觀眾才肯離去。

昨晚嘉賓環節,軒仔跟觀眾說:「2021來到最後一日,無論今年發生所有唔好嘅,唔順利嘅嘢,我決定用呢首歌送走佢!」音樂響起,大家已知道是《係咁先啦》,MC $oHo & KidNey和Kayan9896升上台,全場觀眾企起身,用歡呼聲大合唱,歡送2021年!MC $oHo & KidNey和Kayan9896接着唱了《Black Mirror》。進入倒數時間,蘇致豪、許賢、Kayan跟軒仔與全場觀眾倒數,並大合唱《倒轉地球》,氣氛hit爆。

倒數過後,軒仔再請另一位嘉賓七師傅出場,全場觀眾掌聲雷動,呼叫聲嘈到軒仔說話也聽不到,他叫大家靜一靜,接着笑稱:「大家見到我未婚妻咁開心。」七師傅聞言說:「吓!我哋乜都未做過喎,咪好唔抵…囉。」全場捧腹。

軒仔再說:「你又講得啱,但係我好保守,有啲嘢,我要結咗婚先做…你今(昨)日綵排叫我咩話?你記唔記得?」七師傅回答:「老公…唔係…軒公。」又引來觀眾狂叫狂笑,軒仔笑到彎腰:「我今(昨)日聽到呢個字,個心離一離,新年流流…」

此時七師傅拖住軒仔隻手:「你隻手咁凍,你係咪嚇親?做足18場,日日咁唱真係好辛苦。」軒仔識做表示:「你帶溫暖畀我咪得囉,你有乜嘢秘方教我補身?」七師傅竟說:「下一世唔好做歌星啦,太辛苦啦!做國王算啦你!」軒仔聞言反問:「吓!國王後宮佳麗三千,我個腎點搞?」七師傅面不改容淡定說:「你剩係獨愛一個人咪得囉。」

七師傅及後和軒仔合唱《月亮代表我的心》,2人唱完後,全場觀眾大嗌軒仔「咀佢」,軒仔最初聽不清並反問觀眾,「咩話?娶佢?哦…咀佢…」七師傅即搶答:「我OK㗎!」軒仔笑到說不出話來,冷靜過後他用疫情推卻,料不到七師傅卻說:「但係你聽吓佢哋(觀眾)啲聲!」全場觀眾儼如拆台一樣大叫,軒仔盛情難卻,師傅再來多句: 「你惜邊度都得!」軒仔最後咀了師傅面珠一啖,師傅隨即問: 「使唔使回禮㗎?」軒仔此時肉隨砧板上,企定定任惜。親熱過後,師傅搞笑辯護:「柴J(軒仔花名)粉絲唔好嬲我,佢係屬於大家㗎,我都係搞氣氛。」

軒仔表示得到七師傅嘴唇加持,一定好運過人,不如請師傅再加指點,什麼方位適合他,七師傅回答:「我計過你條命啦,西面最適合你,你一路向西啦,成個紅館都係西面,我畀個錦囊你,你帶睡袋同行李搬去紅館住。」

之後師傅送禮給軒仔:「我本來想送層樓畀你,但係我又驚爆緋聞,啲人話我『包養』你,所以我用好長時間,自己親手做份禮物畀你。」接着,七師傅從膠袋中取出能量塔:「可以帶畀柴J你,日日咁開心!」

(即時娛樂)