近年醉心陶瓷藝術的林嘉欣，為支持本地陶藝文化，身體力行參與一項企劃，並邀請了ANSONBEAN（陳毅燊）受訪。ANSONBEAN享受一天陶藝體驗，並製作了3件陶瓷作品，期間笑料百出，坐不定的他不時周身郁，連林嘉欣亦忍不住叫他：「唔准郁！」還笑指被ANSONBEAN弄至眼花。首次接觸陶藝的ANSONBEAN相當感興趣，更拿起陶泥當雙節棍揮舞、又拳打陶泥，被嘉欣笑他「屎波架生多」呢！
ANSONBEAN表示今次陶瓷製作經歷，簡直是一大挑戰，他說：「我好少會咁坐定定做一件事，第一次接觸陶瓷，覺得好有趣，同時可以學習靜啲，好有藝術感，會發現製作藝術品，係每個人獨有嘅，亦冇分對與錯，陶瓷藝術當中有好多可能性，每件作品都會有自己性格喺裏面。」
ANSONBEAN自言也有靜態一面，他說：「除咗瞓覺，我會喺屋企打坐、冥想，因為我逢緊張都郁好多，會坐唔定，打完坐會好啲，打坐同陶瓷都係修行，打坐注重呼吸，陶瓷就注重手感，好有趣。」
