《造星IV》女團今出道 「前夫反擊戰」專頁吸3.7萬人 5大守則曝光 (14:54)

文章日期:2022年01月12日

ViuTV女團今日(12日)正式出道,除了冠軍邱彥筒(Marf)、亞軍沈貞巧(Gao)及季軍許軼(Day)穩佔3席位外,另外5位女團成員亦有眉目,有網民在尖沙嘴影到大型宣傳片段,當中發現李芯駖﹑陳泳伽(WINKA)﹑沈貞巧(Gao)和Candy(王家晴)的容貌。

女團成員惹熱話,去年7月在facebook成立專頁「我老婆嫁左比Mirror導致婚姻破裂關注組」的一班「前夫」,昨天(11日)作出相應行動,宣布分支「前夫反擊戰」專頁成立,截至今午(12日)近3時,成員已逾達3.7萬。

今早該專頁的管理員Kent發長文,稱本身沒想過設任何規則去限制大家,但他發現有些發文的「亂嚟」程度,連行路踩單車都直播,並放上去該專頁,加上成員人數愈來愈多,故Kent定下少許注意事項,並希望各「前夫」幫手推一推。

Kent羅列5大點注意事項:

1)出post改為要審批,有係前夫谷生存過嘅唔會陌生,因為太多唔關事嘅post,刪極都有。審批內容:廣告唔批﹑唔關女團事唔批(特殊情況外)女團老婆囝嘅相唔係唔比post,但希望有個集中post去放,咁多個老婆囝,一人一張相睇死人呀。

2)各位前夫老婆都注意,我哋呢度唔係haters group,希望大家唔好講啲太過難聽嘅說話,唔好人身攻擊,唔支持唔代表要鬧人,你唔尊重人都尊重下自己。

3)檢舉,唔係叫你哋唔歡喜就檢舉人,如發現有人人身攻擊或者廣告,歡迎檢舉,我一定會睇,請大家善用檢舉功能,呢個同前夫谷一樣,我哋唔鍾意嗰啲post我會delete,我哋唔鍾意啲人會ban。

4)對待商業廣告零容忍,即刻ban。

5)希望各位前夫追女團支持女團時開開心心,老婆追鏡粉時開開心心,花生友又食得開開心心,最緊要開心,大家開開心心完記得返屋企。大家一齊和睦相處,另外呀,多謝大家嘅支持,本身同RC預計一日可能得3千人入嚟,大家超額完成咗件事,感恩﹗

另外呀,12/1/2022今日就係女團成立之日,谷名我哋再考慮下改唔改啦﹗前夫們,準備好未?女呀﹗﹗﹗多多包涵

12/01/2022 Kent

(即時娛樂)