被無綫要求與李佳芯保持距離 陳恩德感侮辱 抽起千萬廣告 (18:02)

文章日期:2022年01月26日

李佳芯(Ali)跟有「蟲草大王」之稱的陳恩德(Mark)早前被爆密會,近日又指2人秘戀逾1年,網上流傳多張2人合照,包括陳恩德為Ali慶祝生日。Ali昨天(25日)發聲明澄清秘戀報道,再次強調2人只限工作洽淡,從沒發展過任何關係,今後亦不會有任何發展空間。

今天(26日)Ali原先出席一個NFT發布會,但最後改為蔡潔、王丹妮及老公羅孝勇擔任嘉賓。Mark受訪時表示:「佢(Ali)經理人有特別要求,喺呢個event唔可以同陳先生合照,即使上台大合照,一定要同陳生保持距離,要隔幾個人先可以影相,陳生同Ali唔能夠同時接受訪問。

喺我哋公司立場,係好冇禮貌,甚至係帶點侮辱嘅一個要求,咁我哋即時問『點解臨尾會有啲咁嘅要求嘅?』當然同經理人嘅對話嗰個唔係我,咁佢哋send返畀我哋嘅時候,我諗我只能夠傳WhatsApp畀Ali,問『係咪你主意』,佢冇覆我。」

問到2人關係是否轉差?Mark說:「佢(Ali)後來有覆,不過唔緊要喇,係私人內容,總之佢意思係公司要求各樣各樣,唔緊要喇,咁經理人打嚟,我即刻答『唔需要喇』,唔需要原因,唔係Ali問題,係我哋需要嘅係尊重。好似今日咁樣嘅event,起碼都要介紹,起碼都要影幅相。首先我都要聲明,我都唔係鍾意影相嘅人,頭先佢哋要我影相,我一幅都唔影,我好怕影相。

我講咗我立場先,亦都因為咁嘅原因,最後我哋cut咗唔使佢(Ali)出場,呢個係TVB嘅問題,我哋亦出晒信去投訴,我亦都抽晒所有TVB廣告,即係我覺得以我一個每年用千萬元計嘅客戶而獲得咁嘅待遇,我覺得佢哋簡直侮辱緊我。(有沒有討論件事或和解?)我諗樂易玲自己交代吓啦!」

此時,Mark的律師表示:「啱啱老闆講過,出信去TVB,我哋會書信來往,尋求達成共識,我哋希望咁樣。」

再追問跟Ali私下有沒有聯絡?是否追求Ali?Mark則說:「私人問題就唔答,頭先屬於公事,就解釋一次。好多人問我點解活動有Ali個名,但Ali唔嚟,所以交代一下。(追求Ali?)我只可以咁講,喺我單方面,佢會係我好朋友,就算今日佢冇嚟,我會照送番NFT畀佢,我哋呢啲好冇所謂,其他私人事我就唔答,咁佢(Ali)想點講,我完全尊重佢講任何嘢,OK?但我覺得我唔需要去同佢去講任何說話,大家朋友。」

問到除了給NFT外,會否給予出場費予Ali?他說:「唔會咯,因為TVB收㗎嘛,唔係佢私人收。」至於會否告Ali違約?Mark的律師再度搭嘴:「我哋因為會書信來往,呢個我哋會處理。」

談到Ali發聲明劃清界線?Mark再說:「頭先講咗,佢想點講都冇所謂,喺我原則就係,唔好特別傷害佢喇,佢係一個好人。」

相關新聞:被指跟「蟲草大王」陳恩德秘戀一年 李佳芯澄清:從沒發展過任何關係

(即時娛樂)