由吳君如﹑鄭中基﹑梁詠琪（Gigi）和呂爵安（Edan）合演的賀歲電影《闔家辣》，雖然未知何時正式上映，但團隊依然落力「谷」戲，《闔家辣》的Instagram專頁今天貼了Edan向戲中3位長輩拜年𢭃利市的短片。
片中飾演Edan的父母中基和Gigi，以及演姑媽的君如向Coba（Edan飾）派利市，君如向Edan說：「嚟緊學業進步，唔係，生意興隆。」Edan亦賣口乖說：「青春常駐﹗」𢭃完利市後，Edan即場拆利市，他先拆老竇鄭中基的利市：「老竇年年都係嗰個數，少咗10元喎﹗」中基發現後即搞笑說：「畀錯咗，呢兩封先係。」Gigi則封了200元利市，Edan向中基詐型：「媽咪派兩嚿水呀，係你嘅4倍呀﹗」
接着Edan拆姑媽利市，原來君如封了8000元給他，Edan興奮大叫：「嘩﹗姑媽好嘢，學下姑媽啦你兩個（指父母），祝姑媽青春常駐﹑身體健康﹑心想事成，龍馬精神。」Edan更向君如送吻，大曬溫情，Gigi見狀笑說：「你個人好現實呀﹗」Edan則說：「跟你學呀嘛，講錢呀﹗」
