黎美言（Winkie）日前與紅酒KOL May拍網片，走訪香港隱世食店，了解受疫情打擊的餐飲業近况。Winkie坦言疫情下開工感緊張，但全程戴口罩做足保護：「話唔驚就假嘅，但保護功夫都做到足，袋住清潔用品，隨時保持個人衛生，雖然有啲擔心，但呢個係我過年後第一個工作，所以叫有個好開始。」
Winkie表示自己開辦跳舞學校多年都穩賺，又謂生意不俗想再發展：「因為大家記得我跳舞學校出身，所以好信我哋課程，但依家去到樽頸位，要學點樣管理人手，呢日嘅老闆個個都身經百戰，要學人哋點樣做生意。」
她笑言新年剛過去，疫情下不用拜年，沒有被親友逼婚。Winkie表示早前在社交網站重貼工作婚照，引起朋友關注：「朋友問我係咪宣布婚訊？又話太遲生BB會有難度，搞到我要諗係咪要雪卵。（不設防準備生小朋友？）唔識答，總之順其自然囉。」
