勁騎26|孖Alton撐枱腳互訴心聲 花姐認無法了解MIRROR真實一面 (23:20)

文章日期:2022年04月29日

MIRROR成員王智德(Alton/王勁)主持的ViuTV節目《勁騎26》,今晚(29日)播出第5集「花姐的26假期」,Alton主動致電邀請經理人花姐(黃慧君)亮相節目,起初花姐推說好忙,檔期已爆滿,之後她續說:「正常嚟講我會唔會太重,令(電單車)前轆翹起先?」

Alton說:「就係本身驚嘅,但佢哋安排咗一架...你有冇聽過蝙蝠俠與羅賓嗰款車?隔籬有車斗款式?」花姐笑稱:「我坐喺嗰個『兜』(車斗),我仲使見人嘅?係咪我做咗之後,個節目會好睇先?如果令到Alton節目好睇,我會坐嘅﹗」

花姐最終應允亮相節目,她坦言起初強力反對Alton買電單車:「因為我由細到大都唔鍾意人揸電單車,因為我嘅經歷﹑我身邊朋友話畀我聽,揸電單車係好危險嘅事,但我會答應,似乎我對Alton嘅support好少,同埋我都想佢拍嘅節目好睇,而我覺自己會令節目好睇囉﹗」

節目組還安排了軍褸及軍帽給花姐穿上,Alton大膽笑花姐造型滑稽,之後Alton和花姐齊齊坐上Sidecar,花姐坐在車斗位置時表示:「其實(個位)又唔係好迫,我又唔係好肥。」Alton附和:「冇錯,你冇自己想像中咁肥。」當Alton開始踩油時,花姐嚇到大叫:「唔使咁急喎,我唔趕時間。」接着2人就駕駛及乘坐電單車利多於弊展開辯論,花姐先說:「坐電單車係直接聞到臭味,冇車廂隔着,牛屎味道都直接飛埋嚟。」

Alton則說:「但你唔覺得依家將遊車河感覺發揮到極致咩?(邊度極致?)因為四周冇嘢包住,感受晴天。(我同你極致位唔同,前後有嘢包住會安全啲。)」花姐坦言不喜歡,因為陣風撲面令她感辛苦,及後剛巧有部載豬貨車駛過,一陣豬糞味飄過,搞到花姐即時掩鼻:「我食晒喇﹗」

花姐表示Alton和隊長Lokman(楊樂文)比較適合揸電單車:「因為你兩個成熟穩重啲,雖然你(Alton)間中都有脾氣,但比較上識諗啲﹗」

然後Alton和花姐一齊歎美食,Alton說:「你有冇發現我哋好似係第一次一齊撐枱腳?」花姐說:「係呀,有啲慚愧,係咪?其實我哋都識咗四年,證明你幾唔鍾意我。」Alton再說:「我覺得冇機會囉﹗因為好多時都會有其他人喺度,然後有其他人,對話氣氛變得官腔同嘻嘻哈哈。(花姐:同埋唔係好熟,唔係熟到今晚約出嚟食飯,其實都好呀,我覺得我哋要有個距離。)」

Alton再追問花姐對他有什麼看法,花姐說:「我對你嘅睇法有幾個階段,最開頭剛入MIRROR時候,你係好Positive嘅人,跟住,年紀的確係大咗啲,但覺得你有熱誠,後來拍《男排女將》,我經常出現,有機會同你傾偈,我覺得你幾好笑,會將一啲唔好嘅嘢化為笑話,雖然好似好阿Q精神,但係我欣賞呢一點。」

Alton對於花姐欣賞他「呢個人都幾好笑喎」,他則說:「嗰下其實有少少心灰,我記得當時Jeremy(李駿傑)喺我隔籬,事後你轉身走咗,Jeremy同我講:『你不嬲都係咁,不過花姐依家先知』,佢講完呢句後,我就話『係囉﹗』但我唔會搶住向你表現自己。」

花姐接着說:「你哋都未必完全畀真嘅一面我睇,就如我同我個仔關係,佢唔會畀最真實一面我睇,佢同同學及同佢喺屋企對住我係唔同,我都未必真係了解你哋最真實一面,或者你哋選擇性畀我見到你嘅模樣,咁我咪睇唔到囉﹗」

(即時娛樂)