關心妍（Jade）下月初在紅館舉行演唱會，個唱舉行在即，近日Jade加緊綵排。她表示已準備就緒，但騷期迫近難免心情緊張：「因為時間唔多，綵排都唔係好多次，唯有次次都當開騷咁做，真係好刺激。囡囡上台表演呢一part，終於有啲眉目，因為我搵朋友借咗啲瑜伽墊，咁就可以完成佢嘅夢想上台打筋斗。」
近日fans在社交網上留言估嘉賓，更提議不同歌曲點唱，Jade表示很難滿足大家：「嘉賓唔會太多，總之有男有女，因為我都想成個騷自己唱，fans成日網上點唱，我估到時佢哋都會喺位度嗌出嚟，但我盡量睇時間，唔會畀個騷超時，因為唔係好多錢㗎咋，唔好搞到主辦被罰錢。」
雖然疫情緩和，Jade仍不敢掉以輕心，用最高防疫規格準備：「因為我哋要對觀眾負責，依家好驚自己病，謝絕所有探班、打氣，老公每日去我所到之處消毒、擺晒消毒機，佢係呢個騷嘅『衛生組組長』，有佢喺度我都好放心。」
