將於下月紅館舉行「Between Us 鄭欣宜演唱會2022」的鄭欣宜（Joyce），日前推出新歌《我地》，邀請彭秀慧導演再為MV操刀，並由型男胡子彤擔任男主角，與Joyce飾演情侶。
他們手拖手穿過森林和山谷，又在草原奔跑，其間遇上一群小黑羊食草，更走近坐在草地上談情的Joyce和子彤，這班電燈泡變成臨時演員，令MV更添浪漫氣氛！
甚少演愛情戲的Joyce說：「我唯一拍過有愛情戲分，就係彭導電影《29＋1》，而上次拍MV有男主角，都差不多10年前，今次邀請胡子彤演情侶可謂精挑細選。」
身旁的子彤說：「好榮幸參演呢個史詩式愛情故事嘅MV，非常好玩，第一次跟彭導和Joyce合作，我本身好少拍MV，拍戲又無愛情線，所以特別期待我哋兩個都咁少拍愛情故事嘅人會擦出咩火花。」彭秀慧說：「第一次聽呢首歌已經好感動，好想拍成史詩式愛情故事，縱使有好多經歷和障礙，只要相信就有希望。」
日前Joyce相約子彤開Ig直播欣賞MV首播，他們隔住熒光幕放閃，互嗌對方「男朋友」和「女朋友」，原來他們在MV拍攝現場，就以男﹑女朋友稱呼對方，Joyce透露：「今次MV拍咗兩日，第一日雖然子彤唔使埋位，但佢嚟咗探班，走嘅時候佢同我講：『女朋友，拜拜！』其實我哋只係見第2次面，好多謝佢咁投入MV角色，我當然嗌返佢『男朋友』啦！講完都有啲面紅。」
另外，Joyce跳唱歌曲《豐乳肥臀》榮登第22周叱咤903專業推介冠軍歌，亦是她今年首支叱咤冠軍歌。
