日日媽媽聲|關心妍細述囡囡「胎前記憶」 分享佗B親子三部曲 (14:26)

文章日期:2022年06月06日

由余安安、羅敏莊、陳凱琳擔任主持的《日日媽媽聲》第二輯,昨晚(5日)播出第7集,請來關心妍、周志康、方紹聰(奶仔)擔任嘉賓。

已為人母的關心妍(Jade)透露,婚後約1年已開始為生B努力,可惜徒勞無功,令Jade心急如焚:「啱啱開始試咗2、3年都冇,當時仲未心急,但到第3、4年就開始覺得『係咪有事呢?』,去到第6年,我就同自己講如果等到40歲都冇,嗰時我已經36歲,咁不如領養啦,我哋兩個都好鍾意小朋友。」

想不到1年之後,卻意料之外傳來好消息,令Jade難以相信:「好感恩,會覺得『等咗咁耐,你終於嚟到喇!』」Jade分享「佗B親子三部曲」:「我每日都會同佢傾偈、唱歌同祈禱,每日都有同佢嘅時間。」

Jade在主持要求下,分享了囡囡「胎前記憶」,她坦言被冧到爆喊:「唔知真定假,佢(囡囡)講㗎啫,但我做媽咪聽到係冧到不得了。大家知我等咗佢7年,我每晚都會陪佢瞓嘅,嗰日我忍唔住多謝佢嚟到呢個世界上、又話我真係好鍾意佢,點知佢無啦啦彈咗句:『我都等咗你好耐啦,我喺舊雲上面等你,Jesus喺嗰度畀我揀(媽咪)。』(你點知係我?)你粉紅色頭髮㗎嘛。』咁嗰時我演唱會嘅髮型,真係粉紅色頭髮嘅...嗰晚我叫完阿女瞓,就衝出去搵老公爆喊,好感動,亦想鼓勵番媽媽們,你等緊佢(BB)之餘,其實佢都等緊你。」

被指是「佛系爸爸」的周志康笑言,早已打算早婚並對婚姻充滿期盼:「我係孻仔吖嘛,我由細到大都好想有人畀我照顧,咁我依家屋企有3個Queen畀我照顧。我係最縱兩個女嗰個,亦係最惡嗰個。」

主持問志康兩名女兒,曾否撈亂他和哥哥志文時,他坦言從來沒有,反而老婆認錯過一次:「因為佢唔知我係孖生,嗰時佢第一次上我屋企,我咁啱整緊嘢、我阿哥去開門,佢就奇怪點解呢個人咁熟悉又咁陌生嘅。」

 

相關新聞:為生重磅「奶仔」爆微絲血管 方紹聰餅印媽咪分享親子碌面大法

(即時娛樂)