由「旅遊達人」梁芷珮（Christy）主持的《東．南歐潮什麼》，明晚播出最後一集。
Christy上周帶大家玩完克羅地亞後，昨晚及今晚轉場去到波黑及黑山。波黑出名多靚景，Christy先遊覽莫斯塔爾的最新景點Skywalk，通過全長35米、玻璃底觀景台欣賞無敵靚景，畫面非常壯觀；之後去到著名的克拉維斯瀑布，一邊歎咖啡一邊享受自然奇觀，簡直Chill到爆。
講到歎咖啡，原來薩拉熱窩的舊城區，有非常獨特的飲咖啡方法，就是嗒一啖糖後再飲一啖咖啡，樂於「嘗新」的Christy體驗過後亦大讚過癮。最後Christy提提大家去波黑旅行小貼士，就是要記得兌換好當地的貨幣，因為經歷過戰亂的當地人喜歡收現金。
至於黑山相對比較好玩，Christy在堪稱世界上最美麗的25個海灣之一的科托爾灣、大玩直立板遊湖睇靚景，加上只要30多歐元（約250元港幣）便能玩足3個多小時，相當抵玩。
翌日Christy晨早9點出海，參觀位於海中心的岩石聖母教堂，並前往靚到爆的Blue Cave遊玩，只見海水在陽光照射下泛起藍光，令人驚艷！最後Christy入住了童話式民宿，屋子雖小但五臟俱全，Christy更笑言自己如白雪公主一樣，十分搞笑。
