鄭欣宜（Joyce）昨晚舉行首場紅館演唱會，身穿橙色露肩巨型紗裙登場，清唱《女神》為個唱揭開序幕。她隨後在台上一秒變身，換上一身熒光粉紅色長裙，令觀眾驚喜尖叫。欣宜見狀一度感動哽咽︰「我唔想喊住，畀我講啲好重要嘅嘢先，非常多謝每一位買飛入嚟支持我嘅人。4年前，我已經開咗第一次紅館演唱會，但唔知點解，今次感覺好似係第一次咁，可能因為過去呢4年裏面，大家用咗好多心機同時間去重新認識我，好多謝你哋畀我呢個耐性。」台下觀眾大叫「加油」、「愛你」，欣宜強忍眼淚，深呼吸後續說︰「開四面台，我真係有少少緊張，因為我係零方向感，你哋邊一邊反應大，嗌大聲啲，我就向嗰一邊唱。」語畢，欣宜唱出《我地》及《救命歌》。她說︰「希望呢兩首歌可以提醒大家，無論個世界變得幾壞都好，只要有『我地』，everything will be ok，因為 love is always inside。」
