偕潘燦良首演舞台劇《最後禮物》 黃子華被讚100分神演出 (15:22)

文章日期:2022年07月23日

黃子華、潘燦良主演的40場舞台劇《最後禮物》,因疫情延至昨晚首演,台下星光熠熠,劉嘉玲、林嘉欣,余詩曼、蘇施黃、金燕玲 、蘇永康、蔡一智 、徐濠縈、陳國邦、許靖韻等大批圈中人現身捧場。眾演員完成演出後一起上台謝幕,觀眾掌聲雷動。

潘燦良在台上說︰「劇場需要觀眾,當延期時,我身邊朋友冇一個退飛,個個都同我講,死都揸住張飛,等到我哋演出嗰日。今日終於見到大家,真心好多謝各位同我哋一齊堅持嘅觀眾。 我就識識哋演戲,但唔識講嘢,不如留畀一個好識講嘅人講。」黃子華笑道︰「識講嘢一啲都唔重要,最重要係識做人。我首先多謝楊受成先生,各位真係唔係講笑,呢個騷停咗6個月,其間好多騷停咗,一停就冇咗,好陰功。要好有實力的人,先可以喺6個月後安排做番咁多場。呢個戲,我同燦哥排第1、2日,佢已經同我講『呢個戲好勞氣』,真係,呢個戲係一啲都唔容易,健康差啲都做唔到。感激成個團隊,我哋合作好愉快,非常感恩有呢次機會,感恩觀眾冇走到。Thank you ﹗」

黃子華完騷後到後台跟好友見面,被讚是100分的神演出。他受訪時說︰「神,係呀,我當自己『神神哋』!今晚演出一定有好多進步空間,舞台日日唔同分數,同拍電影唔同。舞台日日唔一樣,觀眾互動、對手互動、自己狀態、當日血壓都有影響,係一個好刺激嘅活動。基本上做呢個戲,各位鐘意睇人疲倦係好抵睇,我試過綵排後開車回家,綵排地方同我屋企只需10分鐘車程,但我開咗5分鐘車攰到喺條最繁忙街道上同自己講瞓喺路邊算,頂唔到,後來真係要泊停架車休息一陣先再返屋企。我打算每晚8點開場,完場11點幾返屋企,12點瞓到第2日早上7點9,咁應該夠休息,然後返嚟開工。」

潘燦良表示︰「好開心終於等到今日一齊見觀眾,其實疫情煞停係不幸中大幸,隔半年大家沉澱咗又有新體會,角色深化一一改善。呢個戲真係唔簡單,但主要我同子華,3個鐘戲由無乜嘢發展到好激烈兩兄弟之間嘅爭鬥,真係每次做完都覺得好花工夫同氣力,好勞氣。哈哈。我老婆已經搬定張按摩椅出廳畀我按摩紓緩。不過,同一個咁好團隊合作,同子華對戲,係一件好享受嘅事,再攰都開心。」

(即時娛樂)