MIRROR演唱會舞台機關問題惹關注 AK姜濤演出險象環生 (12:30)

文章日期:2022年07月26日

MIRROR紅館演唱會昨晚(25日)開鑼,氣氛熱烈,不過騷前爆出總綵排時有舞蹈員發生意外,其間疑有人將責任,推向為MIRROR伴舞的舞蹈員身上,令眾舞者感不滿,紛紛在社交網出黑Po泄憤,甚至有人留言嗌「垃圾」﹑以粗口單字表達不滿。而AK(江𤒹生)亦默認有意外︰「第一次係意外,第二次係大意,第三次係疏忽。」

昨晚首場演出順利完成,而MIRROR的官方Instagram貼出12位成員在後台合照,並寫道:「《MIRROR.WE.ARE LIVE CONCERT 2022》Day1,明(今)天繼續見大家!」有不少網民留言,關注演唱會舞台的安全問題,事關有在場睇騷的觀眾,影到四面台機關重重,甚至拍到驚險時刻,有網民發文寫道:「今(昨)晚仲有好多好危險嘅moments,好多人見到,咁樣要台上表演者點相信嗰台?要點俾盡力表演?要觀眾點enjoy the show?」

當中最驚險要是AK在升降舞台上勁歌熱舞時,升降台突疑似驟降並大幅度搖擺,AK疑似失平衡立即烏身卸力,執生成功的AK繼續演出;另外,在一個平衡木舞台上,MIRROR全部在沒有佩戴安全帶情况下,在不足1米闊的舞台走動,甚至輕舞,但該台的交接位置不同,姜濤險差錯腳,呂爵安亦突然踩低了一層,嚇得他拍心口定驚,但觀眾睇見都牙煙。

有網民盼主辦單位留意表演者安全:「我寧願你乜都冇但係佢哋安全嘅,身邊睇咗嘅朋友都話條橋好郁,但係下面仲要係dancer,又有呢啲升降台嘅問題,好心要搞咁多嘢都注意好安全先,我哋唔想俾錢嚟睇意外。」﹑「我睇演唱會,唔係索拉奇藝坊,睇到人心都離一離。可唔可以搞掂舞台啲機關,先叫班仔上去,啲橋又窄又搖搖欲墜都算,AK升降機上嚟一路跳緊,最尾chok得咁大力,又無嘢扶,跣咗AK出去就頭落地喇,好彩AK身手好識卸力啫,到底有無check過㗎,有無QC㗎!係咪乜都要執生,執唔到生死人㗎!」

(即時娛樂)