陳柏宇（Jason）將於8月27日與曾參加無綫首屆《超級巨聲》的王嘉儀（Sophy）合作演出音樂會，兩人音樂風格各走兩極，合作演出極富新鮮感。Jason說：「其實我一直好喜歡同新嘅音樂人合作，好似之前就同Novel Fergus、Kiri T、Serrini等人合作過，而每次合作都會有新嘅體驗，相信今次都唔例外。」王嘉儀表示︰「Jason講嘢都用丹田，好勁，可想而知佢唱歌功力相當深厚，加上佢唱歌有講故事嘅感覺，相信到時我都會沉醉其中。」
Jason與王嘉儀預告將會為音樂會度身訂做不一樣歌單。Jason最期待聽到自己的作品帶有Sophy的風格：「Sophy嘅音樂唔係香港常見嘅曲風，好想將Sophy嘅音樂元素擺喺自己身上。」Sophy亦聽到Jason的獨特性，期待2人擦出火花。她說：「Jason嘅音域好濶，係應該可以唱到好高音嘅男星。我自己作為女歌手把聲有啲磁性，亦都算係唱到幾低音嘅女歌手，所以喺聲音上嘅碰撞應該可以好好玩，好期待同Jason唱合唱歌，同埋改編一啲歌曲。」
