關嘉敏及蔡思貝日前為新劇《你好，我的大夫》拍攝跳樓戲分。今次是關嘉敏首次拍攝危險動作戲分，問她是否感緊張，關嘉敏說：「都有少少緊張㗎，我拍呢場戲前一晚太緊張，個腦不停諗應該點樣演繹好？應該點樣跳落去好﹑到真係要埋位企上去，都有少少腳震，唔係好敢望下面，所以周圍望風景，仲見到何廣沛喺樓下同我Say hi，好快就無咁緊張喇。
當跳咗一兩次之後，我居然覺得有少少好玩同興奮，之後我哋喺氣墊嗰場戲，仲吸引埋張振朗同李日朗圍觀，仲畀佢哋笑我哋不停喺氣墊上面自拍，但係唔知係咪太刺激，拍完個晚我成晚都瞓唔著。腦海全部都係高空躍下去畫面，雖然拍呢場戲係有啲刺激，但要提醒觀眾朋友，呢啲危險動作，需要有專業人士在場指導，大家切勿模仿。
今次劇情係講我因為個病，而有輕生念頭，好彩有Sisley（蔡思貝）捨身相救，最後我哋一齊跌落氣墊，Sisley仲因為咁擦損左手臂。長氣都要提多次觀眾朋友，有心事唔開心要搵朋友傾訴，千祈唔好有輕生諗法。」
