陳曉東（東東）日前接受由許文軒主持的《StarTalk》訪問，談到新歌《這種年紀》，東東說：「今次同伍仲衡合作，佢之前寫過一首《愛你（躲你）》畀我，之前冇乜點聯絡，但係後來愈來愈熟，同埋呢首歌佢話係為我度身訂做，諗住我嚟寫。（歌詞提及『時光如潮汐退』？）我唔介意，去到某個階段，一定會對某啲事情，睇得更通透，有新嘅領悟，為咗證明我唔介意，所以去錄！」
陳曉東稍後舉行個唱，他說：「今次係一個戶外嘅演唱會，到時應該會好熱，一上台就濕晒！（除衫？） 好似唔係太好，乜咁暴露咩？內容方面希望可以同觀眾多啲互動，開Party，可能我會派水槍，等佢哋射我！」
談到近年喜歡電子音樂，他說：「唔好見我成日唱情歌，我私下鍾意聽電子音樂，鍾意聽嗰啲聲，因為通常最新潮嘅歌同聲，就係喺電子音樂出現，我學過打碟，不過要時間練習同學混音技巧，有啲即場創作感覺，我成日想將自己輕快舊歌，變做Remix同電子音樂，睇下有冇機會喺演唱會騷畀大家睇。」
