任賢齊（小齊）在電影《失衡凶間》的單元《唐樓》中飾演過氣江湖猛人，他在其中一場半夜與吳海昕、陳湛文和車保羅偷運屍體戲中，被滿身酒氣的張松枝「爆樽」。雖然只是道具糖膠酒樽，張松枝拍攝時仍被碎片割損手掌，而小齊就感到頭痛，工作人員立即用膠紙黐走他們頭皮及臉上的微小碎片。
小齊說：「雖然個酒樽係糖膠做，但頭都有少少痛，而且碎片都有啲鋒利，所以爆完頭，工作人員要用牛皮膠紙幫我黐走身上嘅碎片。千祈唔好用手撥，我差啲用手撥，被工作人員阻止，因為好易𠝹傷皮膚。」
雖然連續拍幾晚通宵戲，小齊仍堅持跑步健身。他說：「我拍通宵戲，習慣返屋企瞓一陣先，然後出去跑步，然後返屋企瞓多陣再去開工。不過，前兩日跑完步，朋友叫我去划艇，之後再直落去片場開工，諗住收工返屋企可以好好休息，點知撞正樓上裝修，瞓唔到，我依家好眼瞓。」
