王祖藍主持的《有個閨密叫祖藍》，昨晚（18日）播出第8集，今集嘉賓是炎明熹（Gigi）。「遊戲王」Gigi在製作組安排的「閨密快問快答」、「潮語知多少」、「猜猜畫畫」及「代溝測試」環節中，先後展現古怪思路，令祖藍與製作組連番黑人問號。
Gigi在學校中有兩名「閨密」，除協助她上網課，又會與她分享心事及為她打氣。Gigi又與其他少女一樣，一早已計劃好戀愛之路，Gigi透露早與家人商量好，理想結婚年齡為30歲，並透露理想對象要像多啦A夢，令祖藍哭笑不得。
談到與After Class成員姚焯菲（Chantel）、鍾柔美（Yumi）及詹天文（Windy）關係，Gigi對她們讚不絕口：「Chantel比較成熟，有時做訪問或者要做抉擇，對我嚟講都比較困難，但佢竟然可以分析畀你聽，一句一句咁，令我覺得好有道理。Yumi就非常活潑，係氣氛擔當，Windy就搞怪啲。」Gigi又慶幸首屆聲夢學員，不是爭勝心強的人：「我哋個個都唔會話一定要贏，我覺得好難得。」
Gigi又直認參賽《聲夢》初期，完全融入不到其他學員之中：「大家圍埋一齊傾偈，我就坐埋一邊，我比較怕醜同慢熱，有時我要諗到傾咩我先想講，否則停咗喺度我會好尷尬。（王：真係覺得自己外星人？）係，依家會主動同佢哋傾偈。（王：點解會咁？）應該嗰時未知道點樣同大家溝通得良好啲，或者驚自己將話題終結。我覺得自己成日都九唔搭八，有時我聽唔明人哋某啲用語，我會畀咗反應先，然後就偷偷地喺屋企查番個term係咩意思。」祖藍聞言即勉勵Gigi：「其實你唔使怕話畀人聽『我唔明』。」Gigi聽畢即連番點頭。
另外，昨晚緊接在myTV SUPER播放的加長版，除了會有更多Gigi笑爆肚行徑，最特別是祖藍會應製作組要求，說了「給17歲Gabby的話」，Gigi聽畢更感動至眼濕濕。祖藍說：「17歲係好興奮嘅年紀，相信你已經有自己嘅世界，你要繼續好似Gigi咁努力追夢，鍾意做乜就做乜。屋企道門永遠打開，有事就話畀我聽，冇事就自己享受青春啦。」
Gigi指祖藍心態與自己父母猶如倒模，向來重視家人的Gigi，除了應祖藍要求合唱《世上只有》，更向家人隔空發表「示愛」：「有啲咩嘢煩惱，都可以同我講架。」對於祖藍讚其孝順，話題離不開家人，Gigi坦承：「因為屋企人係唔可以缺少。」
