MIRROR演唱會事故發生2個月 舞蹈員促主辦方交代:還Mo一份尊重 (16:24)

文章日期:2022年09月29日

MIRROR紅館演唱會7月28日發生墜屏傷人事故,事故剛好發生兩個月,受傷舞者李啟言(阿Mo)目前仍然留醫,女友蘇芷晴對阿Mo不離不棄,照顧有加,而一班有份演出MIRROR的舞者,繼續在社交網紛紛發聲,盼主辦單位為事故交代。

在MIRROR演唱會舉行前在綵排中受傷的舞蹈員羅德智(Zisac),昨天在社交網發文,他表示最近看了很多舊相,入面有很多都是紅館表演時的相片,他看到好享受舞台的自己,心想如果有一天再以舞蹈員身分踏上台板,是否仍然享受,抑或會不停擔天望地:「深怕上面幾時會有野跌落嚟;或者台面幾時會有不能預計嘅錯誤,我從來都冇諗過原來齊人上台,無穿無爛咁一齊落返嚟,都係一種幸運。

兩個月了,啟言仲喺醫院,先唔講再上台,希望變返之前咁嘅身體狀態都要祈求奇蹟。啟言身體需要好多時間,咁調查同交代需要幾多時間?我哋等緊一份報告,等緊一個交代。」

另一位舞蹈員Saiter亦在社交網貼相及撰長文:「由意外發生到今(昨)日,啱啱好兩個月。對一般人嚟講,都係依稀平常的日常日子。重複每日返工,放工,放假,最後又繼續返工嘅常態。

當然,我原本都諗住Mirror演唱會之後,我既生活都係會繼續呢個常態。繼續排舞,繼續見到大家,繼續嘻嘻哈哈,繼續享受我工作中嘅自由。

一場完全無法想像嘅意外,都唔知係唔係意外嘅『意外』,就將呢個常態徹底打破。我呢個叫做無事嘅,終歸要回覆翻自己生活當中,但感受已經完全唔同。每一日都會有好多既『點解』、『如果』喺腦海入面浮現,不斷重複。好想等到一個滿意,合適嘅交代,但係,真係會有滿意嘅答案嗎?相信大家心裏有數。

咁我既戰友,呀Mo呢? 都莫論呢個常態,好似所有嘅嘢,係嗰一秒鐘過後,都即刻變得奢侈。我諗好多想做舞蹈員/以跳舞為職業嘅人,都真係用夢想去支撐自己行呢條路。我哋享受用肢體表達任何事情嘅自由,但呢一刻,呀Mo連自主移動身體自由都無埋。

要用跳舞喺香港生存,從來都唔係容易嘅事情。所以我哋好少會出聲,好少say no,因為會驚無咗份工。

演唱會呢個行業更是,舞蹈員幾乎係呢個食物鏈裡面嘅最低層。幾十年嚟,大家都係用『執生』去過每一個難關。因為我哋知道我哋講咩都無人會聽,因為如果我地太麻煩,就可能會被標簽為『麻煩Dancer』,之後就會無人錄用。

『點解係我哋?』呢個問題,我諗呢一世都得唔到答案。係呀Mo代大家『食』咗呢個幾十年嘅計時炸彈,呢個代價實在太沉重太昂貴。舞台上面既我哋/Mirror,都絕對無可能承受得起呢個代價。

而已經付出嘅呢個代價,係咪可以為將來嘅行業作到些少既改變,至少係安全方面嘅保障可以大大提高?倘若我再次踏上舞台,係咪可以心無雜念,勇敢面對,呢一刻我都唔知...

一諗到呢兩個月,你(阿Mo)每日起身張開雙眼,淨係可以望到冷冰冰嘅天花板,未來仍然係未知數,我心裏面都非常不好受。我知道你一定會再企翻起身,繼續番我哋嘅『常態』。

對唔住大家,成日都走出黎發噏風。喺乜嘢都做唔到嘅無力感底下,只可以衝出嚟提下大家,呢件事情仲未完。」

另一位女Dancer亦在Ig發表感受:「我們需要一個交代,還Mo一份尊重。」

相關新聞:MIRROR演唱會事故發生2個月 So Ching為阿Mo打氣:你一定會好番

(即時娛樂)