《超能使者》阿鏈被「處死」 監製文偉鴻解畫:佢係成佛 (19:58)

文章日期:2022年12月03日

無綫劇集《超能使者》昨晚大結局,監製文偉鴻「處死」阿鏈(陳展鵬飾),要他在Q姨(唐詩詠飾)面前老死街頭,好殘忍!阿鏈以「時間倒流」能力將日子逆轉至一年前的「6月6日6時6分6秒」大型車禍之前,除了阿鏈的犧牲,所有人生活如常。有網民對結局有異議,形容:「好人唔死、壞人唔死,25集戲,我究竟睇咗咩?」

文偉鴻回覆《明報》為何「處死」阿鏈,說:「佢係成佛!佛無形無相,不一定如神般展示,劇集開首我就用上666魔鬼暗示去賜呢5位使者魔鬼大能,成魔還是成佛,一切皆看你能否戰勝心魔,是否心中有愛。」

文偉鴻提到《超能使者》創作靈感源自《西遊記》,但他向公司「賣橋」到跟編劇度劇本時,他也沒有透露想將《西遊記》變時裝與超能力的底蘊,他說:「一來賣橋難獲批准,若果我向編劇講出構思,又怕惹無限聯想,以為我想拍唐僧、孫悟空與豬八戒。我只係要《西遊記》的概念,唔需要角色化,誰是馬騮精等等。一邊創作劇本時,我就暗暗將我的意念推向軌道,守這個秘密足足守了兩年。」

他稱劇中的超能使者每遇到救助事件或困難就等如《西遊記》中師徒遇難關挑戰或惡魔的誘惑,他說:「《超能使者》是講苦行苦修的經歷,喺香港做藝術片中心思想的題材好難做,希望雅俗共賞,以商業的包裝,我才可以借用少少空間去說我的想法。」

另邊廂,有觀眾心痛阿鏈的犧牲,陳展鵬在社交平台報平安兼放閃。他分享「老妝」阿鏈跟太太單文柔的恩愛合照,是太太往探班時所拍,他寫道:「大家放心,阿年冇事,有人收留咗我,有個後生女照顧,日子過得不錯。要同我守秘密,唔好講比其他超能使者知呀!後會有期#超能使者#好劇有好報#頒獎禮 」

(即時娛樂)

相關字詞﹕超能使者 文偉鴻