張敬軒昨晚（2日）出席一個廣告頒獎典禮，憑早前為手提電話品牌的廣告微電影《前夫的愛》擔任導演一職，獲得大會頒發4個重要獎項；由於當晚軒仔無預警驚喜現身，現場一陣哄動，深受客戶喜愛的他，更獲在場人士排長龍集郵，軒仔亦有求必應。
軒仔首次執導，即以導演身分獲獎，他坦言感覺特別，他說：「好開心，亦都好特別，因為入咗行20年，第一次拎一個同唱歌冇關嘅獎項，正如好似今年年頭我曾經講過，今年會以一個新人身分，乜嘢都會去嘗試。自己亦都好榮幸，有客戶嘅Support、投資，同埋有信心搵我做導演，去拍廣告微電影，我先至有機會去參與呢件事。」整個拍攝過程中，軒仔表示最困難是經驗不足，所以他特別感謝團隊。
問到得獎後會否激發他多參與幕後拍攝工作，他謂「導演」對他來說，是一個新嘗試，而且一點也不容易，他說：「通常做歌手或者做演員，都係幕前演出，但做導演要兼顧嘅嘢實在真係好多好多，係一啲都唔容易。雖然好榮幸獲得導演廣告微電影嘅獎項，但自己都係抱住學習嘅心態，去試多啲唔同範疇嘅嘢，或者將來可能遇到好好劇本，令自己又心思思想再突破一下自己極限，睇緣分。」
