王菀之(Ivana)最近獲機場快綫邀請，聲演機鐵仔，並演唱機鐵仔首支單曲《飛得去旅行》。日前Ivana成為第一位登上機鐵仔全新主題列車參觀，進入港鐵小蠔灣車廠，她很興奮，上車後更開心激動大叫，「嘩！我直頭覺得自己下一站係去機場，冇帶喼都覺得自己一陣間就係去旅行！」
Ivana已3年冇飛，上車後心情真係好激動，原來自己好掛住搭機場快綫去機場的感覺，旅行快樂回憶返晒嚟。進入主題列車車廂，她見到好多機鐵仔之外，亦見到好多佢自己個名同收聽《飛得去旅行》的QR Code，即刻「嘟」嚟試，開到個電話最大聲跟住唱。她說：「我依家諗緊，不如搵次叫歌迷會一齊搭呢架主題列車，佢哋送我機咪得囉，之後成班人一齊『嘟』個QR Code，跟住一齊唱，你估會點？哈哈，諗起都好玩呀。我真心覺得演唱會可以唱呢首歌，係嚟緊我演唱會嘅主題曲！哈哈。」
問到Ivana聖誕是否放假去旅行？ Ivana稱2023的工作檔期已經滿晒。所以她只可以用工作之間的時間，攝位去旅行：「例如嚟緊要拍少少音樂上用嘅影片，咁就去日本拍嗰陣，順便留多兩日玩，之後去美國做音樂會，留多兩日咁囉。唔係真係冇時間去到旅行。」
