1998年港姐冠軍向海嵐（Anne）早前入股保健產品，由星級代言人「升呢」兼任老闆娘；日前，Anne身穿低胸長裙拍攝產品廣告，做出拗腰、曲腿等動作甫士，務求展現不一樣的性感優雅。
今次廣告拍攝，Anne既出錢又出力，她說：「擺咗好多心機喺今次拍攝中，由度橋、造型、硬照設計，到甫士上都有參與研究，想出嚟效果同其他品牌『不一樣』，亦希望見到一個『不一樣』向海嵐，然後就記得產品。」
拍攝期間，Anne擺出多個優美的高難度「甫士」，就連Anne亦笑指這些「甫士」跟人體工學相反：「好多人唔知，影相啲甫士唔係正常人可以擺到，可能腳喺呢邊，個身喺嗰邊，同人體工學係相反，但最緊要出嚟效果靚。」
廣告中，Anne盡顯性感高貴，為以最佳狀態示人，Anne花了3星期喼弗，她說：「之前過咗自己生日月，再加上有好朋友外國返嚟，差不多連續2個月不停咁食，短短時間重咗8磅，為咗拍攝，事前努力喼咗3星期，食少啲嘢、勤做運動，因為知道今次拍攝會見到手臂、心口。」
