MIRROR成員呂爵安（Edan）推出全新R&B作品《LOVERSE》讚頌愛，MV中Edan化身外星人，與地球人發展超友誼感情。
Edan今次首度與周耀輝合作，歌名特別加入元宇宙（Metaverse）概念，變成《LOVERSE》，Edan為大家解釋歌名及歌詞內容意思，他說：「《LOVERSE》係想講愛對人類好緊要，愛喺全宇宙都係一個共通嘅語言，喺任何地方都會發生，係一件永恆嘅事。」
新歌有兩句歌詞令Edan印象很深：「愛就要笨到像天才 / 愛就要大到成為大愛」，他覺得這兩句的形容很巧妙，他說：「愛未必好Logical（邏輯性），未必好有原因，甚或有時可能會好蠢，但呢個就係愛嘅精神，唔好諗太多，唔好估太多。我開Live都有講過，希望呢個世界多啲愛，每個人都可以多少少愛或者大愛啲，成個世界會開心啲，大家都會舒服啲。周耀輝老師寫嘅詞，同我嘅理念好接近，所以好鍾意﹗」
今次是Edan第一次接觸R&B，一直很擔心難以拿捏，為了盡善盡美，他特別用了7天時間灌錄《LOVERSE》，是繼《E先生連環不幸事件》後，灌錄時間最長的一次。
《LOVERSE》本來預定在聖誕節推出，不過最終改到大除夕才面世，這卻與MV裏的情節吻合。因為MV裏有倒數情節，Edan化身外星人來到地球，遇上一名少女，發展出超出估計的情誼。Edan變身外星人，原來有段古，他說：「以往啲MV我都係演一個貼地男生，會經歷大家經歷嘅嘢，好多類似嘅嘢，所以就諗不如試新嘢，或者跳脫啲，冇咁現實嘅嘢，結果揀咗外星人主題。自己聽咗個故仔，都覺得好吸引，更提出我要做外星人。」
為了演入型入格外星人，Edan不但換上誇張服飾，他更漂白頭髮，又戴了Colour Con，讓人眼前一亮，他說：「今次應該係出道以來最誇張嘅一次，誇過出騷，但好好玩，可以著啲好誇張嘅嘢，可以試新形象，睇落都唔錯。」
不過，Edan擔心自己表現，未能令人信服自己是外星人，他說：「唯一少少擔心自己做外星人，會唔會好傻仔？因為全程畀女主角Lead（帶領）住做一啲嘢，乜都唔識咁。希望出嚟感覺大家會覺得幾得意，亦希望畀到大家想像空間，想像如果倒數時有個外星人喺背後出現，會係點呢？」
今次《LOVERSE》MV不但要在不同地方取景，又要轉換多個造型，更要一日內完成拍攝，所以整個拍攝進程都緊張，Edan也說：「都幾辛苦，咁嘅長鐘工作模式，有少少懷念但同時又好有動力，因為好耐冇試過咁Chur拍MV，加上成個MV嘅氣氛同主題我都好鍾意，所以OK。今次最攰係戴Colour Con，不嬲戴Con都唔可以戴好耐，會好攰好拮眼，加上前兩日開始喉嚨痛，有少少咽喉發炎，有少少感冒，好在有Keep住食藥，我比較擔心女主角多啲，因為有幾個Shot（鏡頭）同我好近距離，我同佢講都應該病硬。」
Edan還分享他今年目標：「2023年希望出多啲唔同種類嘅歌，其實都袋住咗啲歌好想出，亦都係風格好唔同，希望可以儲多啲唔同種類嘅歌。另外就係繼續唱多啲歌，變靚仔啲，做戲做好啲﹗」
