《萬千星輝頒獎典禮2022》今晚（8日）舉行，郭可盈和呂良偉負責頒發「最受歡迎電視男角色」及「最佳男主角」。陳山聰憑《金宵大廈2》擊敗大熱林敏驄﹑陳展鵬等，開齋首奪視帝。
陳山聰激動含淚說：「非常感恩，喺我人生馬拉松入面，我覺得最困難唔係面對自己失敗，最困難係係由失敗點樣企起身而步向成功，今日我想同呢10年幫過我嘅人講，我終於可以踏進成功一步，我做到呀﹗首先我多謝《金宵大廈1﹑2》，特別多謝李施嬅，多謝編劇﹑編審，多謝我嘅好巴打阿細（監製葉鎮輝）。
當然多謝TVB喺23年嚟不斷畀機會我提攜我，特別呢10年畀機會，唔係因為今日成功而多謝佢，因為喺我最失敗時點樣幫我，當時身分獎門人，今日係我哋總經理，多謝「阿爸」曾志偉，多謝失意時問我仲想唔想拍劇，你幫我好多。另外兩個，如果唔係佢兩個（珍姐﹑樂小姐）執返呢個百厭星返嚟，唔會有今日嘅陳山聰，呢個恩我永遠記得，佢哋點樣雪中送炭，最後多謝我老婆，為我付出咁多﹑生咗個仔咁靚仔。」
