林敏驄、江美儀、鮑起靜、黃嘉雯、郭栢妍等主演的劇集《下流上車族》，在無綫《萬千星輝頒獎典禮2022》上奪得「最佳劇集」。坐足一晚的林敏驄壓軸上台，先宣傳他將於3月舉行的兩場演唱會，然後又恭喜出爐視帝陳山聰。他說︰「個人嘅榮辱好小事，識我嘅梗係攞終極大獎﹗」林敏驄表示能參與《下》劇，令他感到很驕傲，隨後多謝台下的高層曾勵珍和曾志偉。
他說︰「多謝我老友總經理（曾志偉），同佢一齊做嘢咁多年，佢對我都冇乜好過，我哋一直等佢良心發現。拍完劇之後，我同美儀、曾生食飯，我覺得佢甚至比我更加了解我，佢好似係一個最好嘅朋友，默默守護喺你身邊，佢知道晒你哋可以做到啲乜嘢，同埋知道你有乜嘢不足，適當嘅時候會推你一吓，多數時間想推你去死。因為佢有善良嘅心，我諗呢度幾百人，我都數唔到咁多個係佢幫助過嘅﹗」
林敏驄表示曾志偉令到他們幾個「老嘢」，江美儀即說︰「唔係我，係你咋﹗」林敏驄反擊，取笑江美儀「著到烏雞咁」令全場捧腹大笑﹗林敏驄續說︰「做視后呀﹗今朝食咗幾粒『視后丸』，以為惡補一吓。」江美儀聞言哭笑不得。
