炎明熹驚喜客串《愛‧回家》 自爆係鐵粉 最愛丹爺及「新威龍廣場」 (13:04)

文章日期:2023年01月25日

17歲炎明熹(Gigi)明晚(26日)年初五,將驚喜客串處境劇《愛‧回家之開心速遞》,據知Gigi在劇中演回自己,更會引發連串事件。

對於首度「登陸」《愛‧回家》,Gigi大感興奮,並表示由小學時開始已是該劇捧場客:「我有追開《愛‧回家》,時間許可,我會準時八點鐘喺電視面前觀看,佢哋嘅內容會令到我睇完之後好開心,佢哋每集又會帶出一啲信息,我覺得好生活化。呢個處境劇我係由細睇到大,小學時係《八時入席》,之後再到後尾有唔同系列。」

Gigi又指能客串該劇,感覺榮幸又夢幻:「真係不可思議,冇諗過以前甚至𠵱家睇緊嘅劇,會有機會遇到佢哋(劇中角色),雖然有時喺TVB會遇到大家,但唔會真係話傾偈嗰種。」Gigi表示劇中最尊敬角色是劉丹(丹爺),並爭取機會與對方合照:「我知佢做咗好耐《愛‧回家》,我好開心可以加入呢個大家庭,因為我見到佢哋好似屋企人咁相處,佢哋會互相叫對方阿爸、家姐或者阿妹,然後佢哋亦都好照顧我。」 

另外Gigi還大讚劇中道具相當像真:「我覺得有個好得意嘅地方,我一直以為新威龍廣場係一個真嘅廣場,然後Key個名落去,後來我知道原來係一個廠景,係特登搭出嚟,我覺得好神奇,同埋入面啲產品同店名都好得意,同嗰個𨋢真係好真。」

Gigi更透露希望日後能多點拍劇,因為她很喜歡和公司的幕後工作人員相處,皆因很有愛,Gigi說:「我一直好想拍劇,我覺得拍劇好有趣,我好鍾意同工作人員相處,拍劇時真係會經常對到大家,而佢哋真係非常之好,好似屋企人咁,所以我希望儲多啲經驗同能力後再拍劇。」

喜歡挑戰自己的Gigi,更笑言沒有特別想做的角色:「因為咩角色都想做。」Gigi笑說拍攝當日,遇到兩名可愛小朋友,對方提出合照要求,Gigi還拿出兩顆朱古力冧小朋友,她興奮說:「嗰日誤打誤撞帶咗兩粒朱古力,其實原本我係想試個味,因為冇食過,最後我就一人一粒畀佢哋食,啱啱好,Yeah!」

(即時娛樂)