陳慧琳（Kelly）去年12月中與13歲長子劉昇乘坐司機駕駛的座駕離開寓所落斜時，在嘉道理道與對面線的私家車迎頭相撞，車頭損毁。Kelly臉部及手部有少許擦傷、腳部撞瘀；劉昇的臉也有少許瘀傷。兩人被送往廣華醫院接受治療後回家。時隔接近個半月，Kelly今日在社交網分享進行拍攝工作時的照片，雖然她自言臉部未完全消腫，但相中的她完全看不出有疤痕。
Kelly說︰「車禍後第一個photo shoot，塊面未完全消腫，仲有啲𢲡。我知道需要時間康復，但係時間唔等人，而這個工作亦是撞車之前已經接咗，冇辦法唯有抱住樂觀嘅心態迎接工作。懷著戰戰兢兢嘅心情，一入門口就見到王丹妮喺度影緊相，成個團隊同我打招呼，Hello... 心諗佢哋好似見唔到我撻疤喎...... Yes，過咗第一關。接着同事攞出一盤盤剛到港嘅珠寶，WOW，極速唔記得咗自己仲有受傷。唔知係唔係兔年行好運嘅關係，竟然鏡頭出嚟好靚喎，遇上好嘅攝影師、好嘅燈光、好嘅場地，極速超額完成！最後祝大家兔年吉星拱照，最緊要出入平安﹗」
商台DJ朱薰留言︰「好靚！完全唔覺！」也有網民說︰「完全睇唔出有傷！大吉大利﹗」
