陳柏宇（Jason）去年底獲邀赴日本，拍The First Take（TFT）音樂企劃，全新編曲的《你瞞我瞞》早前已推出，點擊率已衝破350萬人次，而在TFT中錄製的另一首歌曲《有天》，亦於昨晚推出，Jason分享錄製第2首歌的背後小故事。
Jason上次灌錄重新編曲的《你瞞我瞞》，不少網民發現歌曲的Key降低，有網民坦言較喜歡舊版，但Jason喜歡新版本，他解釋：「舊版本編曲已經有啲久遠，當年嘅歌聲演繹，已代表唔到喺我𠵱家呢個年紀，對於呢首歌想表達嘅情感同心理狀態，新版本演繹方式，比舊版沉重、滄桑又有經歷得多，情感係豐富、複雜好多，降咗Key嗰種層次﹐又同原Key有唔同，原Key就唔會有𠵱家咁Man！」
另一首作品《有天》，屬於志氣高昂的一首作品，Jason的演繹又予人另一種觀感，但細心留意，會見到Jason唱至尾聲時，竟不慎撞到咪高峰前的網！搞笑的Jason自爆錄音小秘密，他說：「其實我平時錄歌，投入到合埋眼唱時，都有機會撞到個咪，純粹自己協調唔到，都經常性發生。」
Jason亦講到這次灌錄《有天》背後的小心思，就是身上的那件外套，Jason說：「背脊寫咗『Hong Kong』二字，代表到我係嚟自香港，我哋香港嘅Art Director幫我揀呢套衫，係一個好好嘅選擇。」
此外，Jason將於2月4日舉行《陳柏宇 feat.九龍搖擺俱樂部演唱會2023》，撞正新年期間開騷，他只好選擇性「避年」，他說：「演唱會已準備得如火如荼，所以今年冇好主動去拜年，亦盡量避開同小朋友玩嘅聚會，因為同小朋友玩好傷聲，講得特別多嘢，聲帶亦好難休息，所以媽咪（老婆符曉薇Leanne）都好配合，我亦有同囡囡（Abi）解釋，同佢講：『爸爸要做完演唱會先可以同你玩，因為呢排爸爸比較忙，要多啲私人空間，做完演唱會再同你玩好冇？』佢話好，好乖！」
