黎瑞恩（小恩子）快將「入五」（2月18日），日前她收到驚喜生日會，作為她50歲的生日禮物，現場除有一大一小醒獅及應節兔獅助興外，又以切燒豬代替生日蛋糕祝賀。
由於事前不知道有精心安排，她甫到場感驚訝，表情搞笑，她為醒獅點睛及接財神後，笑說：「好多謝朋友送驚喜畀我，好開心、好突然！」
問她正日生日如何慶祝？她表示想反璞歸真過平靜生日：「好多朋友話我『入五』要大搞，但我每日都同好多朋友見面食飯，日日過得好似生日咁，所以2月18日正日生日時，想靜靜地過，畀我思考嚟緊有乜可以做。（生日願望？）希望個個都身體健康同埋開心。」
不過未過生日前，她覺得已遇上好事，就是隔離令解除，日後可自由出入，又指一向愛遊大嶼山，以前覺得遊人多太擠逼，但經過疫情後，見市面恢復人來人往熱鬧場面，令她有所體會：「開心睇見番繁榮熱鬧嘅香港，希望可以一直繼續保持住。」至於未來大計，她希望趁自己有心有力尚年輕時，放眼世界遊勻內地名山大川：「整咗架旅行車周圍去，內地好多美景，好似天池咁，諗住分6條路線走，每一條路線都要行幾千公里，所以都需要一段時間先可以完成。」
