年逾70歲的無綫綠葉程可為，在TVB拍攝多部劇集，包括《宮心計》﹑《超能使者》﹑《七公主》﹑《樓奴》﹑《美麗戰場》等。昨天（6日）程可為亮相港台電視劇《我們的畢業禮》，原來她兩年前已約滿無綫，現時以自由身接洽工作，她解釋起初無綫不再包薪跟她續約，改為簽一年一騷，她坦言有段間感到不開心和難過。
由無綫第一期訓練班出身到現在，程可為花了大半世時間在舊東家工作，她接受傳媒訪問時說：「有陣時我又會同對方諗下，𠵱家經濟唔好，咁又可能支出有所限制，我年紀大保險費又貴，有時為人哋諗下，自己唔好難過，時勢唔好，對方搵唔到錢，就唔可以有咁大支出，咁你體諒呢樣，自己放寬去諗，自己會開心啲。」她續說：「喺嗰度做咗大半世，突然好似唔要你，個心好唔舒服，好難過，但回心一諗，將心比己，過去3年大家都好頭暈，用平常心去諗，就會開心啲。」
程可為表示現時工作時間明顯沒以往長，她表示比較有規矩，她說：「喺TVB編幾多場就要拍晒幾多場，呢個港台節目幾健康，返得早，可以6點開工，最夜都係10點零收工，好少捱天光，所以對我哋𠵱家咁嘅年齡係最適合。」而程可為在無綫最後一部劇《隱門》尚未播映。
