《毒舌大狀》破8200萬 取代《明日戰記》膺史上港產片票房冠軍 (18:42)

文章日期:2023年02月09日

由黃子華﹑謝君豪﹑楊偲泳﹑何啟華(阿Dee)﹑廖子妤﹑王丹妮﹒栢天男﹑谷德昭等合演的賀歲電影《毒舌大狀》,上映不足3星期,票房已衝破8200萬,正式取代《明日戰記》,成為史上港產片票房第1位。

黃子華說:「講出來都好難相信,《毒舌大狀》竟然成為咗香港電影史上票房第1位,點解嘅?我由細到大都不乏幻想,我幻想過在街上有人塞袋錢畀我,甚至乎塞部車畀我,甚至塞幢樓畀我,我都唔敢諗,有一日我有份參與嘅電影,會成為百年嘅香港電影史上第1名,我真係未諗過,我自己有咩感受都係其次,我有排都未諗到自己有咩感受,我背脊好似生咗對翼出嚟咁,想鬆吓咁,鬆毛鬆翼。

我想問Why? 點解嘅?點解套戲咁受歡迎呢?我睇過一個觀眾留言,佢嚇死我,佢話從來冇睇過港產片,佢去睇《毒舌大狀》,係香港人冇睇過港產片喎!都畀我哋吸引咗嚟睇,呢種深海魚,好難先引到佢上嚟,希望好多深海奇魚幫我哋入場睇下,究竟呢部戲係唔係值得第1名,如果係嘅話部戲仲可以走得幾遠呢?當然已經攞咗第1名,好多謝觀眾,無論第1名可以維持到幾耐,時間唔重要,多謝大家畀經驗我哋。」

謝君豪說:「好開心《毒舌大狀》成為有史以來最高票房的港產片,而且只是用了短短兩星期,多謝觀眾捧場。我自己仍有一個願望,希望《毒舌大狀》再破紀錄,成為首套破億港產片。」

(即時娛樂)

 

相關字詞﹕毒舌大狀 明日戰記