艾粒一連4場《Part2 ! 王鳳女士 XYZ 銀河道士大匯演》昨晚（9日）在九展Star Hall開鑼，少爺占與當奴在台上分享入行經歷、趣事，更分別化身經典廣播劇角色王鳳女士及銀河道士，為觀眾帶來驚心動魄的鬼故及耐人尋味的Phone-in生活煩惱。兩人首次獻唱新歌《仍然未說的》、當奴首支個人單曲《好運來來來》及多首艾粒經典歌曲。延續Part 1，「靚人會」及「潮人會」繼續展開連場對戰，「潮人會」率先取得第一場勝利。
觀眾全場笑聲不斷，惟艾粒其中一個演出環節卻焫着余迪偉。余迪偉今日凌晨在社交平台上載艾粒舞台熒幕的照片，熒幕播出余迪偉浸溫泉的照片，配有「迪偉同你浸溫泉」字句。余迪偉說︰「Enough is enough﹗你哋都玩咗咁多年啦，我都冇出聲咁多年啦，你哋都有頭有面有地位，仲玩？呢張相係我IG嘅，有冇經過我同意上你哋個大台去賺錢呢？呢單嘢係性取向歧視同埋職場欺凌！ 」
