新四十二章|戴耀明入行30年首認真「談情」 濃妝謝嘉怡閃現搶鏡 (17:32)

文章日期:2023年03月03日

無綫劇《新四十二章》,昨晚(2日)播出大結局。大結局焦點,自然是章經(陳豪飾)、螢嬌(龔嘉欣飾)對戰Nasa(糖妹 黃山怡飾)的「貨櫃大戰」。章嬌聯同一算(鄭子誠飾)、Mon(江嘉敏飾)、Zoie(鄺潔楹Judy飾)及Ronald(吳子冲飾)等,與Nasa連環激鬥,Ronald與施朗(戴耀明飾)慘死,Nasa最終中槍兼被阿嬌打飛落海。

相關激戰昨晚在網絡引起不少迴響,Ronald和施朗之死感動網民,前者一句「對不起」,後者臨終前,不斷以手拭抹波鞋上血迹舉動均甚是洋蔥。

其實施朗一角早有鋪排,因視Nasa為再生父母一直忠心不二的施朗,為人絕不奸險,身世亦帶點可憐,自少缺乏愛和溫暖,所以當同一屋簷下的Zoie送了波鞋給他時動了真情,與施單(衛志豪飾)同樣單純。施朗獲得愛的波鞋後,不但為Zoie任勞任怨,又多次為了女方「放水」,堪稱「戇直癡情男」,貨櫃大戰中,施朗亦是為了救Zoie,而成為Nasa劍下亡魂。

戴耀明受訪時表示入行逾30年,首度「認真」談情:「雖然唔係好埋牙,冇咩攬攬惜惜,但都幾深刻;以前就算有感情線,都係好Gag嗰啲,但呢次咁認真談情,仲要係悲劇收場,講真我覺得好新鮮,亦都好喜歡,好多謝監製阿Joe(陳維冠)畀我試。」

對於拍檔Judy,明仔則坦言曾動過真情:「嗰場我臨死嘅戲,當鏡頭影住Judy見唔到我時,我會捉住佢隻手幫佢入戲,調番轉影我大頭時,佢又會捉番我隻手幫我入戲,嗰一刻有種互相需要感覺,嗰剎那嘅情緒係真嘅。拍完場戲大家都咁啱去廁所,嗰種並排而行嘅感覺好奇怪,真係有啲似戀愛,之後當然冇事啦,係嗰刻未抽離到啫。」

昨晚結局還驚現兩大彩蛋,包括曾在第21集亮相的「紅衣美人」謝嘉怡,及以Frances(譚凱琪飾)細妹身分首度現身的JW王灝兒。只是閃現大結局的JW,一來即要落淚演出,原來JW是阿Joe專誠邀請演出,事緣阿Joe很喜歡聽JW唱歌,一直希望找對方合作拍劇,Joe受訪時說:「原本想搵佢演長平公主,但後來寫寫下又發展唔到呢個角色,不過一定有機會嘅。」

謝嘉怡角色則身分顯赫,除了是八大油王家族後人蘇斯克柴外,另一個維度身分更是蘇菲亞公主。劇情講述年少時曾對章經有救命之恩的蘇斯克柴,欲搶奪大寶丹救患腦癌爸爸;嘉怡在劇中除了濃妝上陣,更首度挑戰揸槍場面,獲讚演技大有進步之餘,更被捧為劇集重要「顏值擔當」。原來該劇算是謝嘉怡半套「處女劇」,她受訪時透露拍攝《新四十二章》時,自己亦剛加入《愛‧回家之開心速遞》劇組,當時最大挑戰是講好對白及廣東話。

相關新聞:陳豪跟觀眾睇結局感興奮 兌現「找數」承諾 孖陳茵媺二人世界

相關新聞:譚凱琪奸角演上癮 盼再做反派 龔嘉欣鬍鬚造型獲緋聞男友讚搞笑

(即時娛樂)