劇集《新四十二章》前晚大結局，江嘉敏（Kaman）在劇中飾演「邵桂芝」，當日拍攝時為角色剪了一個男仔頭髮型。隨住劇集播完，Kaman在社交平台分享當日剪短髮前後的感受。她說︰「最近呢個星期都好開心，因為收到好多好好嘅訊息。首先，前幾日去拍嘢，突然之間有個外國人走過來問我：Are you Kaman Kong？我都覺得出奇，竟然會有外國人識得我。跟住佢又話我喺《新四十二章》裡面好handsome，而家好pretty，完全係兩個人咁！原來佢七年前已經有睇《親親我好媽》，平時仲好鍾意睇我IG彈琴。媽！我得咗喇！我衝出國際喇﹗第二，《新四十二章》我出街嘅第一個禮拜，我收得最多個message就係：估唔到你都Carry到短頭髮，真係幾靚仔。當然，畀人讚外表好睇的確開心，不過我最開心嘅係當《新四十二章》播到嚟第二個星期，我收到嘅message係：『好鍾意你同子誠嘅火花，你同Judy真係賤格得嚟又好可愛，你真係越嚟越似小寶啊！』」
