謝天華難忘著T-back與男舞者曖昧跳舞 盼舞蹈員保障提升 (21:07)

文章日期:2023年03月29日

「香港舞蹈演藝人協會」將於下月初假香港大會堂舉行以香港舞蹈歷史為題的大型展覽《舞之步伐‧藝之傳承》,介紹香港由1960年至今的商業舞蹈表演發展歷程。協會創辦人之一的資深排舞師林青峰及榮譽會長謝天華(Michael)受訪時,稱為展覽花了兩年蒐集資料,希望趁機會重組珍貴片段及圖片作紀錄。

謝天華難忘1991年在林憶蓮演唱會上跳脫衣舞︰「跳呢隻舞要除剩一條紅色T-back,仲要同男舞蹈員好曖昧咁跳畀紅館入面萬多個觀眾睇。我聽完,個心囉囉攣,好驚隻舞太激會畀人鬧。好彩有個女歌手睇完個騷,讚我哋兩個男仔跳得好正、好激,令我好有滿足感。第2場時,我已經豁出去,合共跳了10場,加埋排舞大約跳過50幾次。得番條T-back算係我最大底線﹗(依家仲可以咁演出?)我已經做咗爸爸,要睇藝術成分。有充足條件唔係沒可能,但要畀半年時間我收一收肚腩先。」

他坦言舞蹈員生涯十分艱辛,雖然收入一般,但從中學到的身體語言動作對演戲、演音樂劇有幫助。談到當年可曾渴望成為台上焦點時,謝天華說︰「我覺得觀眾入場係睇我跳舞,唔係聽歌手唱歌,好開心﹗我同陳小春、朱永棠會比較舞技,排完舞要睇邊個勁。」談到時下的舞蹈員,謝天華認為他們偏側某種舞蹈,不夠多元化。他說︰「商業舞蹈唔止街舞。雖然近排興K-Pop,但一個專業舞蹈員要樣樣學,可能要跳中國舞、芭蕾舞。」林青峰亦認同新一代舞者偏向跳某種舞,演出機會減少,只好轉去教舞。

舞蹈員李啟言(Mo)去年在MIRROR紅館演唱會上被巨型屏幕擊中,至今仍留醫,謝天華說︰「發生意外後,大家都好唔開心。希望藉住今次事件,舞蹈員嘅保障可以提升,有所改善。好似舞台演出嘅安全性,以前做演唱會冇咩意外,最多都係跌落去,好少有嘢喺上面跌落嚟,希望製作單位留意多啲。我未試過跌落台,因為踩台時一發現問題,即刻會同排舞師講,搵大會去改。」林青峰續說:「事件後,我遇到好多舞者,心理壓力好大。有一批人受影響,寧願唔再跳,轉去教舞。我做表演前,場地Set up已經出現,摸熟個台再帶舞者走一次,每次都好安全,亦唔希望上台時,頭頂仲整緊燈。」

(即時娛樂)