瞞婚欺騙女粉絲感情 鹽叔宣布退出好青年荼毒室 (13:18)

文章日期:2023年04月01日

哲學界KOL「好青年荼毒室」成員鹽叔(楊俊賢)背妻出軌,隱瞞已婚真相搭上女粉絲,他早前在通訊群組向「室友」(粉絲暱稱)公開道歉,及宣布暫停參與荼毒室活動。事件在鹽叔公開道歉後繼續發酵,後來再有報道指該名女粉絲疑曾為鹽叔墮胎,事件連日來惹起網上熱議。鹽叔昨晚(3月31日)在荼毒室的社交平台發文,宣布正式退出好青年荼毒室。

鹽叔說︰「呢段說話,將會係我以荼毒室成員身分寫嘅最後一段說話。首先,我好鄭重咁同呢件事嘅受害人道歉。我犯咗好大好大嘅錯,仲要一錯再錯,冇對你坦白,深深咁傷害咗你,我好認真咁道歉。我知道道歉冇用,但我嘅道歉係真心的,我好內疚我做咗咁錯嘅事。我亦都要同我太太道歉,我冇盡我應盡嘅責任,犯下大錯,再加上我懦弱、拖延、逃避問題嘅性格缺憾,令傷害越嚟越大,我對你唔住。後來嘅網上討論、報道,雖然有不少失實、誤解之處,但錯就要認,打就企定,犯下大錯嘅人的確係我,要負責我亦責無旁貸,就算有被誤會、誤解、或有不實報導,就當係我犯錯嘅教訓。另外我希望大家唔好再嘗試幫我講好說話,因為呢啲都會增加對受害人嘅傷害,呢一刻最需要做嘅係保護佢哋。最後,我喺呢度宣佈,我將會退出好青年荼毒室。」

鹽叔是好青年荼毒室的發起人,「好青年荼毒室」名字也是他改的。他表示一直以來花了很多心血和時間在荼毒室上,致力推廣哲學,因此退出荼毒室是個極度傷痛的決定。鹽叔強調他一人犯錯,希望大家不要誤會荼毒室。他說︰「我曾經講過,如果有成員想要退出荼毒室,就淡出好了,不要退出,因為我覺得荼毒室係我哋咁多個加埋的,我唔想少咗任何一個人。我估唔到,最後要退出嘅係我。呢個對我嚟講真係用血寫成嘅教訓,但我都冇嘢好講,呢個就係我做錯事要承擔嘅後果。」

他坦言一直真心對待室友,視大家為真正的朋友,每次跟室友見面都是珍貴的回憶,因此覺得非常對不起大家。鹽叔最後說︰「我喺度再一次同所有俾我傷害嘅人道歉,對唔住,真係好對唔住。我會努力,好好做人。各位珍重。」

(即時娛樂)

相關字詞﹕好青年荼毒室 鹽叔 楊俊賢