憑《阿媽有咗第二個》角逐影后的毛舜筠（毛姐），聯同姜濤和柳應廷（Jer）亮相金像獎紅地氈，毛姐一拖二帶同戲中兩個兒子亮相，相當風騷，當姜濤現身時，現場的姜糖（粉絲暱稱）隨即高聲歡呼。強尼表示毛姐都有「毛姐力場」，若戲中演毛姐兒子，入圍及提名的機會也較高，問她是否感受到個力場，她笑說：「應該有喇。（今日你手風點？）場面打得好愉快，贏輸都唔計較，特別係同兩個仔參與咁大盛事。（有沒有偏心？）偏唔到呀﹗」強尼問姜濤是否做足熱身及狀態如何？他簡單說：「繼續努力，畀多啲支持同提點，繼續努力。」
Jer去年入圍電影歌曲獎，今年入圍新演員，他說：「其實唔同，上年係自己擅長嘅嘢，但都緊張，今年好開心，有毛姐同姜濤陪同下，見到熟朋友特別放鬆啲。」主持問姜濤讚Jer獲獎原因，Jer笑稱：「高音勁﹑中音甜﹑低音準。」Jer讚姜濤獲獎原因：「一個字，靚仔。」
