ANSONBEAN曾飲醉「斷片」 狂碌人情卡Call朋友演酒客 (17:08)

文章日期:2023年04月20日

在情人節推出抒情慢歌《聰明豆》的ANSONBEAN(陳毅燊),最新派台歌曲,在曲風有180度轉變,新歌《GET WILD》內容講開派對、講玩、講飲酒,更請來在ViuTV原創劇《她和她的戀愛小動作》中合作過的kayan9896,以及本地知名Rapper AKIKO,三位一體共同合作新歌。

ANSONBEAN說:「最初同監製銀爺諗新歌嘅時候,發現一啲好Club beat嘅曲,不如我哋都試下類似曲風,搵邊個寫好呢?最終決定搵AKIKO幫手,因為佢寫嘅歌好感性,又聽到個人好high,後來去《UNIK ASIA Festival》表演搵埋kayan一齊玩,發覺原來我哋三個人都好夾,結果就創造咗呢隻歌。」

有「曲」同享,問到會否配合歌詞內容,飲兩杯才走進錄音室錄歌,ANSONBEAN和AKIKO齊齊耍手擰頭。ANSONBEAN自爆試過飲少少酒去錄音,發現飲酒令喉嚨收緊,唱不出水準。AKIKO表示身為Rapper太多歌詞要記,怕喝酒太放鬆會忘詞,反而錄完音才去飲酒慶祝。kayan9896直言要靠酒精開聲兼壯膽,她說:「我會飲一杯紅酒幫助開聲,之前有朋友教我咁做,同埋頭先拍MV,一埋位就要跳舞,因為未熟習環境,所以都飲咗一杯酒先埋位,幫手壯膽。」

kayan9896不單只有話直說,即使要她在《GET WILD》唱較為敏感的歌詞,一樣無問題,她笑笑說:「都唔係好敏感啫,大家去Party會點樣玩,就點樣唱囉!」

對於酒後做過最瘋狂的事,kayan9896坦言小心,不會與陌生人飲酒,只會在相熟朋友陪伴下飲醉。反而兩位男士,就有過最不堪回首的經驗,AKIKO說:「有次慶功飲到好醉,坐的士返屋企途中,忍唔住叫司機放低我,我喺條街足足瞓咗一個鐘,感受到咩叫天旋地轉,自此我以後唔敢飲咁多。」ANSONBEAN接著說:「試過同朋友去卡拉OK,我飲醉嘔咗落我朋友對鞋同袋。點樣返屋企?唔記得,因為『斷咗片』。」

而《GET WILD》MV在中環一間酒吧內取景,為配合歌詞內容,導演安排了大班年輕人與3位主角狂歡飲酒跳舞,ANSONBEAN到場後再碌人情卡,急召更多朋友到場飾演酒客,一同進入歌詞中party世界兼跳餐飽。

(即時娛樂)