呂爵安貼8年前謝師宴獻唱相片 自嘲表情管理Fail:個樣炒晒車 (21:53)

文章日期:2023年04月21日

中學文憑試(DSE)筆試今日(21日)開考,男團MIRROR﹑一班J2ers包括布樂文﹑黃嘉雯﹑施焯日﹑葉靖儀﹑以及楊潮凱和洪永城等,亦拍片為考生們打氣。

MIRROR成員呂爵安(Edan)今晚(21日)在社交平台,貼出8年前謝師宴的舊照,相中的他穿西裝兼打煲呔拿着咪獻Sing,當年的Edan只有18歲,相當青春,不過他自嘲當年表情管理完全不及格兼個樣「炒晒車」。

曾在中六贏得歌唱比賽冠軍的Edan,是當晚謝師宴表演嘉賓,他還選唱周杰倫的《開不了口》,他自爆當年的MMO是自己剪兼自降Key,他寫道:「真係都幾癲下,如果有片睇返就正了。」

Edan勉勵DSE同學要加油:「捱過咗就可以好似上面呢位先生(Edan自己)咁一身輕㗎啦,同埋個人都會精神啲,靚啲同埋有型啲㗎!(因為考完就會得閒就可以學下化妝)#8年前 #謝師宴wow #有人送花㗎幾威 #嗰陣一考完即刻去釘耳窿 #幾MK #隻眼長期擘唔開咁 #擘擘擘 #個樣炒哂車。」

另外,楊潮凱亦在Ig貼出中五時學生相,跟現時分別不大,他寫道:「今日(21日)考DSE的同學仔!加油!盡力而為,搏盡無悔!」

洪永城亦貼出年輕時的靚仔相:「呢期成日同人講人生係冇標準答案,不過考試就真係有喇。細個讀書麻麻哋,屋企人對分數嘅要求亦都唔係咁高,大個咗就知賴嘢,成日分心,養成唔夠專注。所以專注呢兩日做好一件事,手機、遊戲擺埋一邊,生活所有其他嘢清空佢,搞掂呢壇嘢之後再慢慢玩,你得嘅,努力。」

相關新聞:姜濤自認跌倒過 勉勵DSE考生別怕失敗:有沒有爬起來勇氣?

相關新聞:J2ers為DSE考生打氣 Arthur應考時曾「失禁」布樂文係「J2學霸」

相關新聞:中學文憑試今開考 MIRROR拍片為考生打氣

(即時娛樂)