無綫《馬時亨‧香港情》昨晚首播，第一集嘉賓是張學友與港台前助理廣播處長張文新。學友在節目中公開當年為何突然轉去拍戲的原因：「都係被迫嘅。做到去第4隻唱片時開始迷失，唔知點做，因為1年要做2、3隻碟，10隻歌裏面個目標只係1、2隻歌Hit到，其他只係求其充數。我覺得呢個係致死原因，因為到最後啲人唔信你，10隻歌得1隻聽得嘅，仲要嗰隻要中喎，邊有咁多神仙？咁你咪死囉，死1隻碟、死2隻碟，啲人開始唔聽你喇。嗰時銷量由20幾萬，然後到10萬，跟住去到2.5萬，跌得好犀利。我嗰時覺得『死喇，唔掂』，我係家庭最主要支柱，我要搵收入來源，啲人搵我拍戲，我就真係乜都接㗎喇﹗」談到當年曾推出一張全創作大碟，學友透露是因為當時心情不好：「嗰隻碟2003年做，當時社會環境唔好，好多朋友走咗，所以我寫咗隻《給朋友》。嗰段時間想做啲嘢反映心情、安慰自己。」
