無綫《中年好聲音》總冠軍周吉佩，近日接受無綫娛樂新聞台主持許文軒《Star Talk》專訪，分享得獎感受，又暢談展望、加入演藝圈後的高低起跌、走出情緒低谷的經過。他按許文軒要求細數《中年好聲音》三位值得學習對象，包括吳大強、龍婷及支嚳儀（Venus）。談到年屆71歲的吳大強，周吉佩最佩服他精力旺盛︰「佢好有風采好瀟灑，有時我哋綵排到凌晨1、2點，我行埋去問佢攰唔攰，佢次次都話：『攰咩？』佢係真犀利，有時我哋喺度休息，佢就去咗電視城四圍行。嗰次肥媽演唱會，佢又係四圍行。」周吉佩最欣賞龍婷有自信、有想法及了解自己；支嚳儀思想正向。他說︰「Venus面對唔好嘅評語都可以好從容，佢畀人話對眼生得好埋，仲特登影張相擺出嚟笑番自己，我好佩服佢EQ。佢成日話：『我哋做生意經歷唔少風浪，呢啲冇乜嘢』。」談及認識10多年，一起成長的好友曹敏寶，周吉佩說他們從開始到現在都是打打鬧鬧地相處，他說當年結婚時，曹敏寶比其太太哭得還多。
