《法言人》今晚大結局 馬國明林夏薇婚照率先睇 (17:10)

文章日期:2023年05月12日

無綫劇集《法言人》今晚(12日)大結局,昨晚劇情繼續圍繞TK(陳少邦飾)死亡案進行審訊,金師爺(馬國明飾)為免連累「友情歲月」選擇自辯;熙少(海俊傑飾)、清潔工及維修工人陸續加入作新證人,最新證據矛頭直指Adam(張達倫飾)及Grace(陳嘉慧飾。金師爺最終能否自辯成功仍是未知之數。據知,今晚劇情峰迴路轉,真兇千算萬算,最後竟然連「斷正的證據」就在自己身上亦不知。

劇組今日發布「結局婚照」搶先睇,3對主角金師爺與佑家(林夏薇飾)、大雄(張頴康飾)與Hazel(蔣祖曼飾)、Will(黃嘉樂飾)與Coco(趙璧渝飾)有情人終成眷屬,齊齊舉行「單車婚禮」向「友情歲月」致敬,似乎意味金師爺脫罪成功。

修成正果的金師爺、佑家相當甜蜜,攬到實影婚照,鼻尖碰鼻尖甜蜜滿瀉。林夏薇在劇中三度披婚紗,她笑言:「今次真係算著得最多婚紗嘅一次,雖然今次影婚紗相唔使係咁跑,不過都有難度,因為要坐喺單車度,就住啲姿勢嚟影相會抽筋。」談到與馬國明熒幕情侶姿態大受歡迎,林夏薇坦言有意外驚喜:「見到觀眾正能量留言好鼓舞,希望有機會再同佢合作。」

蔣祖曼與趙璧渝各有各性感,已為人妻的蔣祖曼未曾在現實中穿過婚紗,也沒有拍過婚照。今次為劇集第三度披嫁衣,她透露過程非常急趕:「我哋冇乜時間試造型,而且嗰日好多相都得我自己一個,因為阿康有嘢做,我哋影完合照放佢走先。我係『硬照殺手』,如果場結婚戲係郁住嚟做,我係Ok,但一影相我就會怕醜同尷尬。」

趙璧渝很感激劉家豪總監製、陳志江監製給予機會,讓她嘗試了很多個珍貴的第一次:「我10年來未試過演咁霸氣嘅角色,對我嚟講好大突破。呢套劇帶畀我好多第一次,第一次上海報、第一次喺劇集片頭同片尾曲有鏡頭、第一次擁有咁完整嘅角色,第一次正式影有另一半嘅婚紗相,無論戴頭紗同戒指都係第一次。雖然只係影硬照,都覺得成件事好靚。好多親友甚至街坊見到我都會叫我Coco,又讚我造型好靚,同埋話我跪地嗰場好正好型,我真係好開心。第一次感覺到一個成功嘅角色會係點,當然背後係有好多幕後付出嘅努力去成就件事,我覺得自己好好彩。」

(即時娛樂)