肥媽李鼎|肥媽揭徐小鳳愛情觀 游嘉欣發表「驚人」言論 (22:04)

文章日期:2023年05月15日

無綫節目《肥媽李鼎》今晚(15日)播出第10集,題目是「愛情來的時候」,肥媽與李家鼎(鼎爺)分享戀愛史。肥媽與亡夫Rick十分恩愛,之前曾經歷過一次婚姻失敗的肥媽,曾揚言「死都唔再結婚」,惟最終被Rick真誠打動,肥媽笑言:「我哋一齊夾Band,大家會嚟我屋企食飯,食完飯之後大家開始走,我老公係留到2、3點。最過癮係我阿媽坐喺度『釣魚』,我叫阿媽返上去瞓,點知阿媽話:『佢又唔返去瞓?』後來有一日我老公頂唔順,就同我阿媽講:『Auntie,我同佢結婚啦好冇』,佢唔係同我求婚喎,阿媽知道我哋係認真,之後就返咗上去瞓。」

肥媽再爆與徐小鳳之間的趣事:「有一次去睇小鳳姐演唱會,小鳳姐問我經歷過第一次婚姻唔驚咩,點解會嫁第二次,我就問小鳳姐點睇愛情,佢話愛情係一本小說,睇完之後收埋放喺心中。」豈料肥媽之後的神回覆,令小鳳姐「笑到踎咗喺度」。

閒談期間,鼎爺問肥媽拍拖多久,才可以拖手仔,肥媽坦言:「好耐㗎,唔可以話一拍拖就拖手。」鼎爺則坦言需要1年,並指想惜惜都要問過先,例如:「呢度冇乜人,惜下你得唔得呀?」相當搞笑。

游嘉欣(游游)發表驚人言論,她說:「我覺得第一次時間一定唔可以短。」鼎爺聽到眼都凸埋:「咩時間短先?」肥媽見狀即笑著解圍:「死喇,游游答問題都可以有問題,你答拍拖時間唔可以短吖嘛!」

身為「A0女神」的游游,經過今集後歸納出「出Pool秘笈」,她說:「今集學識兩樣嘢,女人要識發姣,唔發姣就冇男朋友,第二就係要多嘗試,失敗都唔好驚,最緊要試到一個啱。」

(即時娛樂)